ՀՀ ԱԱԾ սահմանապահ զորքերում տեղի ունեցավ «ՀՀ ԱԱԾ սահմանապահ զորքերի վետերանների, կենսաթոշակառուների միավորում» հասարակական կազմակերպության առաջին ընդհանուր ժողովը, որը գլխավորում էր կազմակերպության նախագահ, պահեստազորի գեներալ-մայոր Գրիգոր Գրիգորյանը։

Ժողովին ներկա էին ՀՀ ԱԱԾ սահմանապահ զորքերի հրամանատար, գնդապետ Վաղինակ Սարգսյանը, ՀՀ-ում ՌԴ ԱԴԾ ՍՎ վետերանների ՀԿ ներկայացուցիչ, պահեստազորի գնդապետ Յուրի Վորոնովը և «ՀՀ ԱԱԾ սահմանապահ զորքերի վետերանների, կենսաթոշակառուների միավորում» ՀԿ-ի անդամները։

ՍԶ հրամանատար Վ․ Սարգսյանը, շնորհավորելով ՍԶ վետերաններին կազմակերպության ստեղծման առթիվ, մաղթեց արգասաբեր գործունեություն և վստահություն հայտնեց, որ վետերանները կաջակցեն սահմանապահ զորքերի անձնակազմի դաստիարակության և երիտասարդ սահմանապահներին գիտելիքների ու փորձի փոխանցման հարցերում։

Վետերանների կազմակերպության նախագահ Գ․ Գրիգորյանը խորհրդի անդամների և լիազորների հետ միասին  պարտավորվեցին իրականացնել կազմակերպության առջև դրված խնդիրները և նպատակները։

Ժողովին հաստատվեց կազմակերպության կառուցվածքը, խորհրդի կազմը, մարզերում լիազոր ներկայացուցիչների ընտրությունը, ինչպես նաև քննարկվեցին այլ գործնական հարցեր։

Վետերանների կազմակերպությունը ստեղծվել է հուլիսի 31-ին, որի հիմնական գործառույթներն են՝ վետերանների սոցիալական հարցերի աջակցությունը, ՍԶ ավագ սերնդի կողմից գործող անձնակազմին փորձի փոխանցումը և սահմանամերձ բնակավայրերում երիտասարդության շրջանում ռազմահայրենասիրական ծրագրերի իրականացումը։ «ՀՀ ԱԱԾ սահմանապահ զորքերի վետերանների, կենսաթոշակառուների միավորում» ՀԿ-ն մտնում է Սահմանապահ ծառայության վետերանների /թոշակառուների/ միջազգային հասարակական կազմակերպության խորհրդի մեջ։