1. ՀՀ ազգային անվտանգության ծառայության սահմանապահ զորքերն արհեստավարժ սպաներով համալրելու նպատակով ՀՀ պաշտպանության նախարարության Վ.Սարգսյանի անվան ռազմական ակադեմիայում կազմակերպվում է ընդունելություն: Ուսման տևողությունը 4 տարի է: ՈՒսումն ավարտելուց հետո շրջանավարտները ստանում են «Ստորաբաժանումների կառավարման բակալավրի» որակավորում՝ «Սահմանապահ զորքերի ստորաբաժանումների կառավարում» մասնագիտությամբ, վերջիններիս շնորհվում է լեյտենանտի զինվորական կոչում և ծառայության են անցնում ՀՀ ԱԱԾ սահմանապահ զորքերի ստորաբաժանումներում: Այդ ընթացքում կուրսանտներն ապահովվում են քնելատեղով, անվճար սննդով և կրթաթոշակով: Կրթաթոշակը, կախված առաջադիմությունից և կուրսից, տատանվում է 15000-ից 175000 դրամի սահմաններում: 3-րդ և 4-րդ կուրսում կուրսանտներն օգտվում են ազատ ելքի իրավունքից: Շրջանավարտները ստանում են նաև B, C կարգի վարորդական վկայական:

2. Ընդունելությանը կարող են մասնակցել հայերենին վարժ տիրապետող, իրենց առողջական վիճակով, ֆիզիկական պատրաստվածությամբ և անձնական հատկանիշներով ՀՀ ԱԱԾ զինծառայողին ներկայացվող պահանջներին համապատասխանող միայն ՀՀ քաղաքացի հանդիսացող ներքոնշյալ անձինք.
- հանրակրթական և միջին մասնագիտական ուսումնական հաստատությունների  շրջանավարտները,
- միջնակարգ կրթություն ունեցող և պարտադիր զինվորական ծառայություն անցած մինչև 23 տարեկան անձինք,
- ՀՀ ԱԱԾ սահմանապահ զորքերի պարտադիր ժամկետային զինծառայողները:
Ռազմական ակադեմիայում ընդունելության համար դիմորդները հանձնում են ֆիզիկական պատրաստության ստուգարք, նրանց հետ անցկացվում է ընդհանուր գիտելիքների և զարգացվածության աստիճանի թեստավորում կամ հանձնում են մաթեմատիկա և ֆիզիկա առարկաներից միասնական քննություններ: 
Թեկնածուների բժշկական հետազոտությունն իրականացվում է ՀՀ ՊՆ, իսկ ավարտելիս նաև ՀՀ  ԱԱԾ ռազմաբժշկական հանձնաժողովներում, որը ներառում է նաև թմրամոլության, ալկոհոլամոլության, սեռավարակների և այլ հիվանդությունների առկայության ստուգումը, ինչպես նաև հոգեբանական թեստավորումը: Թեկնածուները սահմանված կարգով անցնում են նաև պոլիգրաֆի (ստի դետեկտորի) կիրառմամբ հետազոտություն:

3. Ռազմաուսումնական հաստատությունների հերթական ուսումնական տարվա ընդունելության քննություներին մասնակցելու համար դիմումներն ընդունվում են յուրաքանչյուր տարվա հունվարի 30-ից մինչև մարտի 30-ը՝ ՀՀ ԱԱԾ-ում և ՀՀ ՊՆ տարածքային զինկոմիսարիատում (երկու տեղում պարտադիր է): 
Տեղեկությունների համար դիմել ՀՀ ԱԱԾ սահմանապահ զորքերի վարչություն՝ ք.Երևան, Եղվարդի խճուղի 117/5 հասցեով կամ զանգահարել 015-57-91-77, 015-57-97-74 հեռախոսահամարներով: